Blog

Choeur International et Ensemble Instrumental de Kigali yakoze igitaramo cyinjiza abantu muri Noheli – AMAFOTO

Abaririmbyi babigize umwuga bibumbiye muri Choeur International, bakoze igitaramo gikomeye cyo gufasha abakunzi babo kwinjira mu minsi mikuru by’umwihariko Noheli baboneraho gutangaza ibitaramo bibiri bateganya umwaka utaha wa 2025.

Ni igitaramo cyabereye muri Marriot Hotel ku wa Gatandatu tariki 21 Ukuboza 2024, cyitabirwa n’ingeri zitandukanye haba mu bayobozi bakuru mu nzego za Leta, abikorera, abaturage basanzwe ndetse n’bakristo mu madini atandukanye.

Bamwe mu bashyitsi bitabiriye iki gitaramo, harimo Umunyamabanga uhoraho muri Minisiteri y’Ubuhinzi n’Ubworozi, Dr. Olivier Kamana; abari bahagarariye Chorale Inyange za Mariya, Christus Regnat, Bright Five Singers, abaturutse muri Ambasade zitandukanye n’Abapadiri baturutse hirya no hino mu gihugu.

Umwihariko w’iki gitaramo cyaryoheye benshi, ni uko nyinshi mu ndirimbo zaririmbwe zahimbwe n’abaririmbyi ba Choeur International et Ensemble Instrumental de Kigali hakiyongeraho izindi nke zakozwe n’abandi batari abaririmbyi b’iyi Chorale.

Baririmbye mu njyana zitandukanye ndetse n’ubutumwa butandukanye mu ndirimbo baririmbye nk’izurukundo, izo guhimbaza Imana, iza-Classic…

Ni inshuro ya 16 Choeur International et Ensemble Instrumental de Kigali ikoze igitaramo kuva yashingwa aho bijeje abakunzi bayo ko mu mwaka utaha bazakora ikindi gitaramo kuri 14 Ukuboza 2025 ndetse bakaba bazakora ikindi gitaramo cyo kwizihiza umunsi w’abakundana kuri 14 Gashyantare 2025.

Umunyamabanga uhoraho muri Minisiteri y’Ubuhinzi n’Ubworozi , Dr. Olivier Kamana, yashimiye byimazeyo Choeur International et Ensemble Instrumental de Kigali ku bwo gutegura igitaramo cy’akataraboneka cyasusurukije abakunzi b’umuziki w’umwimerere. Ati “Biragarara ko byabatwaye igihe kirekire ngo mutunezeze, turishimye cyane kandi tuziko hari ibindi byiza muri kudutegurira.”

Choeur International et Ensemble Instrumental de Kigali, ni umuryango ufite ubuzima gatozi wavutse mu 2006 ubona ubuzima gatozi mu 2008. Ni umuryango uririmba kandi ukanacuranga.

Uyu muryango wazamuye urwego rw’imiririmbire mu Rwanda, aho wagize uruhare mu gutegura indirimbo yubahiriza ibihugu byo mu Karere k’Afurika y’Iburasirazuba (East African Community) cyane cyane ko umwe mu bagize uyu muryango ari we watanze ururirimbo (melody) rw’iyi ndirimbo.

Choeur International et Ensemble de Kigali yakoze igitaramo cya 16 kuva yashingwa

Iyi Korali yahise iboneraho gutangaza ibitaramo bibiri iteganya mu mwaka utaha wa 2025

Abitabiriye iki gitaramo banyuzwe n’umuziki uryoheye amatwi bacurangiwe